Le roy quy n’en prevoyoit que trop les inconveniens avoit tasché de retirer a luy le colonel d’Ornano quy avoit tout pouvoir sur l’esprit de monsieur son frere, et quy ouvroit l’oreille a plusieurs propositions que le roy n’agreoit pas. Il luy avoit donné des le commencement de janvier un office de mareschal de France[1], ce quy avoit plustost dilayé qu’assoupy les brigues et menées quy se faisoint. On avoit en suitte fait la paix avec ceux de la Religion en France pour n’avoir pas a la fois tant de quenouilles a filer.
May. — Finalement au commencement du mois de may, le roy estant a Fontainebleau, pour retirer monsieur son frere de tous intrigues, le mit de son conseil estroit, et luy fit venir le 2me dudit mois. Le mareschal d’Ornano fit premierement ses plaintes de ce que le roy avoit mis de son conseil monsieur son frere sans luy en avoir precedemment parlé, ce que l’on faisoit, disoit il, pour le descrediter ; puis en suitte demanda d’en estre, et en fin qu’il y peut accompagner monsieur son maitre, demeurant debout comme les secretaires d’estat, ce quy luy ayant esté refusé, il desclara plus ouvertement qu’il ne convenoit son mescontentement. Les dames de la cour estoint fort meslées dans ces intrigues, les unes en haine de la mayson de Guyse qu’elles voyoint aggrandir par la prochaine alliance de Monsieur, les autres en haine de madelle de Montpensier, et les autres pour l’interest du mariage de Monsieur. Le mareschal d’Ornano estoit en parfaite intelligence avec toutes, ce qu’il faisoit
- ↑ Suivant le P. Anselme ce fut seulement le 7 avril qu’Ornano fut créé maréchal de France.
