Ce fut assés dit au roy pour luy persuader de faire ce a quoy il estoit en doute, et a dire qu'il n’y avoit que mon opiniatreté quy retardat l'establissement de son armée. Sur cela Monsieur, monsieur le cardinal, Mr le Grand, monsieur le garde des sceaux, et ses deux mareschaux de camp[1] luy applaudirent, de sorte que, comme je le vins trouver le matin pour l’accompagner au Plom (ou il s’acheminoit pour de là voir la flotte angloise et le fort Saint-Martin)[2], je le trouvay fort froid et fuyant de me parler. Il commanda mesmes a Mr du Hallier de me persuader de m’accommoder avec Mr d’Angoulesme. Monsieur le cardinal me le dit aussy par les chemins, et Chomberg me vint accoster, me disant qu’il voyoit bien que le roy n’avoit pas bonne intention de nous obliger, que cela le faisoit me conseiller de ceder au temps comme bon courtisan, et que pour luy quy estoit du conseil estroit et quy avoit trop a perdre, ne s’y vouloit pas opiniatrer. Je ne luy respondis autre chose sinon que mon roy et mon maitre me pouvoit bien abandonner, mes amis me trahir, et mon frere et compagnon en charge, unis et conjoints en mesmes interets, me quitter ; mais que Bassompierre ne s’abandonneroit, trahiroit, ou quitteroit pas luy mesme : qu’il demeurat avec infamie ; que pour moy je me retirerois avec honneur, et que je luy promettois que je ne serois point compagnon en mesme armée, le roy y estant, avec Mr d’Angoulesme, et que pour luy il fit comme il l’entendoit.
