ses habitudes de faste et de prodigalité. Voici ce qu’on lit dans une pièce très-rare, imprimée à Paris, chez Jean Martin. M. DC. XXVI.
Louys par la grace de Dieu Roy de France et de Navarre, à nos tres cher et bien aymez cousins, les ducs d’Angoulesme et de Bellegarde, et nostre tres cher et feal cousin le sieur de Bassompierre Mareschal de France, et à nostre amé et feal Conseiller en nostre Conseil d’Estat le Commandeur de la Porte, gouverneur de nos ville et chasteau d’Angers, salut. Voyant les abus et profusions croistre de jour en jour dans nostre Royaume par toutes sortes de despence superfluë et inutile à la ruyne de toutes conditions de nostre Estat, il est bien necessaire de rechercher les moyens d’y remedier ; et pour cest effect de commettre des plus capables et suffisans personnages pour s’assembler et dresser memoire de ce qu’ils trouveront raisonnable pour la reformation desdits abus. A ces causes nous vous avons commis ordonnez et deputez, commettons ordonnons et deputons par ces presentes signées de nostre main, pour vous assembler et rechercher tous moyens que vous estimerez raisonnables pour parvenir à la reformation de tous les susdits abus, tant és grandes et principalles charges de nostre Estat qu’aux maisons, soit d’hommes ou femmes, trains, tables, et habillemens, meubles, et jeux ou se glissent lesdits abus et desordres, en dresser amples memoires et vos advis, pour y estre par nous pourveu ainsi que de raison. De ce faire vous avons donné et donnons pouvoir, puissance, authorité, commission et mandement special : nous reservans pour les autres conditions de nos subjects, de donner pareille charge à autres personnes selon que le cas le requiert : Car tel est nostre plaisir. Donné à Nantes le huictiesme aoust, l’an de grace 1626 et de nostre regne le 17 : signé Louys, et plus bas de par le Roy, Lomenie.
