me porta ce commandement me fit rompre mon premier dessein.
May. — Le mercredy premier jour de may Mr du Hallier s’en alla a Chastillon de Michaille[1] pour donner l’ordre a cet acheminement.
Les compagnies de Basle et de Salis arriverent.
Du Muy m'apporta de l'argent pour la montre des six mille Suisses que j’ammenois.
Le jeudy 2me le reste des compagnies arriverent.
Le vendredy 3me j’accorday les rangs des capitaines.
Le samedy 4me je receus le matin un courrier du roy par lequel il me fit sçavoir qu’il vouloit luy mesme en personne faire la conqueste de la Savoye, et que je le vinsse trouver a Lion ou il estoit arrivé, pour recevoir ses ordres ; que je fisse cependant acheminer l’armée vers Grenoble ou il se rendroit au plus tost.
L’apres disner je fis faire la premiere montre aux Suisses, et prester le premier serment. Puis leur ayant donné leurs routtes, et mis ordre au surplus de mes affaires, je partis le dimanche 5me de may, passay Lescluse[2] et le petit Credo, fus disner a Chastillon de Michaille et coucher a Serdon[3].
Le lundy 6me je disnay a Gisirieux et vins trouver le roy a Lion. Je le saluay parmy les dames, gallant et amoureux contre sa coustume et mon opinion. Mr de Guyse me donna a soupper.
