par un autre endroit ils vindrent furieusement assaillir le camp dudit duc, a la deffense duquel Mr de Rohan s’opposa avec grande valeur, et y fut fort blessé, pris, et puis rescoux. Le colonel d’Erlach fut pris aussy avec plusieurs autres, et quelque nombre de tués ; le bagage du duc perdu, ses munitions, et quelque artiglerie quy, pour n’estre sy bien attelée que les autres, ne peut suyvre le duc, quy se retira a Laufenbourg, desesperé de voir ses entreprises avortées, et luy reduit a une grande extremité, ne sçachant comment se retirer ny où avoir recours ; ce quy le porta a une determinée et perilleuse entreprise quy luy succeda neammoins avec un extreme bonheur : car les ennemis apres avoir secouru Reinfeld, et fait lever le siege au duc de Weimarch, se devoint probablement retirer de devant cette place, et songer a d’autres desseins, ce qu'ils ne firent neammoins, (soit qu’ils fussent enyvrés de ce premier bon succes, soit qu’ils se confiassent en leurs grandes forces, ou qu’ils eussent en mespris celles du duc de Weimarch, ou ne se pouvant imaginer que celuy quy ne les avoit osé attendre, ayant ses forces entieres, eut l’audace de les attaquer, estans ruinées et desperies par ce dernier eschec), sejournerent deux jours proche de Reinfeld a faire resjouissance de leur heureux succes ; dont le duc Bernard adverty conceut en son esprit de les attaquer au despourveu, et que cela les pourroit mettre en tel desordre qu’il en pourroit tirer quelque advantage, ce qu’il executa aussy tost ; et apres avoir proposé son dessein a ses chefs, et qu’il l’eut fortifié des raysons qu’il jugea plus propres pour les y faire concourir, luy et eux allerent le pro-
Page:Bassompierre - Journal de ma vie, 4.djvu/252
Le texte de cette page a été corrigé et est conforme au fac-similé.
245
1638. mars.
