malheureux pour la France en ce que, le 7me, Picolomini avec une forte armée vint donner dans les quartiers non encores bien retranchés, et fort eslongnés les uns des autres, de l’armée du sieur de Feuquieres devant Thionville ; et en ayant forcé un, et entré dans les retranchements du camp, il suyvit sa victoire, deffaisant et rompant les corps des regimens l’un apres l’autre, sans beaucoup de resistance ; et la cavalerie s’estant laschement retirée, il vint finalement donner sur le parc de l’artiglerie, quy estoit retranché, et ou le general Feuquieres avoit rassemblé quelques trouppes quy en fin plierent, et luy, pris et blessé, fut mené prisonnier a Thionville. Les canons, munitions, vivres, et tout le bagage fut pris, plus de six mille hommes tués, et quantité de prisonniers. Picolomini vint de là en Lorraine prendre Sancy[1], Longuy[2] et quelques autres bicoques, puis s’estant venu presenter devant Mouson quy ne vaut rien, il ne la sceut neammoins prendre d'emblée ; et ayant eu advis que le mareschal de Chastillon marchoit droit a luy pour luy faire lever le siege, il ne l’attendit pas, et se retira.
Mr le duc de la Vallette quy avoit esté condamné a mort le mois precedent, fut executé, le mercredy 8me, en effigie, a Paris, a Bordeaux, et a Bayonne. On y fit a Paris cette ceremonie que l’on vint mettre son tableau dans la barriere quy est au dedans du
