Page:Castets - La Chanson des quatre fils Aymon, 1909.djvu/519

491

les quatre fils aymon

Tele entente ai eü et à moi et à vos
Que je guerpis Richart deles cel pui aucor.
Ne sai qu’est devenus, ja est mors à dolor.
7190Dex ait merci de s’arme, par la soie dolçor. »
« Par mon cief, dist Renaus, j’ai oï le baron :
N’est mie encore mors, mais [en maleise est molt].^[1]
Durement se demente, regraite moi et vos.
Jo cuit, François l’ont pris, li traïtor felon.
7195Lairons l’en nos mener, ou nos le socorron ? »
« Sire, dist Aallars, entendes ma raison.
Laisies ester Richart, Dex li face pardon.
M 191Dame Dex en ait l’ame par sa redemption,
Car ja n’auera de nos aïde ne socors.
7200Ke nos voldroit l’aler qant nos i morrion ?
Ja ne verons le vespre ne le solel escons ;
Tant est grans li mesciés, ja [nos] ne l’endurrons. »^[2]
« Hé malvais, que dis-tu ? ce dit Guichars li blons ;
Faudron nos nostre frere Richart, le fil Aymon ? »
7205« Nenil, ce dist Renaus, par le cors saint Simon.
Et ki li aidera, puis que nos li faudron ? »
« Sire, dist Aallars, diable sont en vous.
Ames le miels lui sol que ne facies nos tos ? »
« Taisies, ce dist Renaus, vos parles en pardon.
7210Certes ne le lairoie por tot l’or de ce mont,
Que je ne le socorre ; ançois irai tos sos. »
« Voire, dist Aallars ; mais se nos departons,
Je di certainement, jamais n’asamblerons ;
Mais tenons nos ensamble, tant comme nos vivons. »
7215« Voire, ce dist Renaus, mais n’est mie raisons
Que nos somes ci .iii. et il est là tos sols.
Or penst cascuns de soi, jamais ne l’i lairons ;
Ou tuit mort ou tuit pris, ja altre n’en ferons. »^[3]
« Par foi, dist Aallars, jamais ne vos faudrons. »

1. 7192 Fin de vers prise de M pour éviter une répétition de mot. L il a grant dolor. Au v. 8057, Alard rappelle très justement à Renaud qui se querellait avec Ogier, qu’il faut penser à Richard : Ne sai se il est mors, car mal ert aeisiés.
2. 7202 Manque une syllabe. Ou bien : endurerons.
3. 7218 M ou tous mort ou tous vis.