ſont baſſes à la coſte, & dans les terres fort hautes. Ils ne ſont ſi plaiſantes ny fertilles que celles du Su, bien qu’elles ſoient plus baſſes.
Voylà au certain tout ce que i’ay veu de cette ditte coſte du Nort.
CHAPITRE XII.
Rriuant à Tadouſac, nous trouuaſmes les ſauuages que nous auions rencontrez en la riuiere des Irocois, qui auoient faict rencontre au premier lac, de trois canots irocois, leſquels ſe battirent contre dix autres de Montaignez, & apportèrent les teſtes des Irocois à Tadouſac, & n’y eut qu’vn Montaignez bleſſé au bras d’vn coup de flèche, lequel ſongeant quelque choſe, il falloit que tous les 10. autres le meiſſent à execution pour le rendre content, croyant auſſi que ſa playe s’en doit mieux porter. Si ce dicft ſauuage meurt, ſes parents vengeront ſa mort ſoit ſur leur nation, ou ſur d’autres, ou bien il faut que les capitaines facent des preſents aux parents du deffunct, affin qu’ils ſoyent contens, ou autrement, comme i’ay dict, ils vſeroient de vengeance, qui eſt vne grande meſchanceté entre eux.