Quant j’eu ces parolles ouy,
Et je vis la flesche en la corde,
Tout le sang au cœur me fouy,
Onc n’eu tel paour dont me recorde.
Si dis : « pour Dieu ! misericorde !
Escoutez-moi excuser, sire… »
Il me respondit : « Je l’accorde.
Or dis ce que tu voudras dire ».
« Ha ! sire, ne me mescroyez.
Ne les Dames semblablement,
Si vous ne lisez et voyez
Le livre tout premierement.
Je suis aux Dames ligement.
Car ce peu qu’oncques j’eu de bien,
D’honneur et de bon sentement,
Vient d’elles et d’elles le tien.
Devant que faire ceste faute
Mon cœur choisiroit qu’il mourroit,
La folie seroit si haute
Que ja nul ne le pardonroit.
Bien est vil celui qui voudroit
A l’honneur des Dames mal faire,
Sans lesquelles nul ne pourroit
Jamais bien dire ne bien faire.
Page:Chartier - La Belle Dame sans merci, 1901, éd. Charpennes.djvu/98
Le texte de cette page a été corrigé et est conforme au fac-similé.
