La dame de Valerne chante
Et fait ses priieres a Dieu
De coer devot, et humle et pieu,
Afin que ses chevaliers ait
Victore ; car pour li se met
En ce parti bien perilleus.
Melyador, qui amoureus
Estoit et plain de grant avis,
Li jette .i. cop, ce m’est avis,
Par dessus le hÿaume amont.
Tel cop, se Diex m’aÿt, bien sont
Grandement a recommender,
Car li espée ala entrer
Ou hÿaume et le pourfendi,
La quaffe et la teste autressi ;
Merveilles fu qu’il ne fu mors.
Melyador, qui fu moult fors
De ses bras, de ce cop l’empaint,
Ce veïrent maintes et maint,
Et jus a terre le reverse.
Buïns cheÿ la teste enverse
Et Melyador dessus li,
Qui dit li a tantost ensi :
« Chevaliers, se tu ne te rens f. 135 c
« Et jure ci devant ses gens
« Foy et hommage a ceste dame,
« La tieste te todrai, par m’ame,
« Car il est bien en ma puissance. »
Li chevaliers, qui en doubtance
Se voit et en tres grant peril,
Dist : « Sire, je ferai, oïl,
« Tout ce que faire vous vodrés.
« Je vous pri que vous vos ostés
« De moy, car je sanne trop fort
« Et bien croi que vous m’avés mort.
« Ostés moy, pour Dieu, mon hÿaume. »
Page:Froissart - Méliador, tome 2.djvu/269
Le texte de cette page a été corrigé et est conforme au fac-similé.
265
Méliador
