Et li pria par mos exprès
Que il les vosist adrecier,
Pour aler a ce Brun Rocier ;
Et cilz leur ensengna errant
Et ala avoech yaus courant
Plus d’une grant liewe pleniere.
Si leur moustra de la bruiere
Le Brun Rocier et le passage.
Bien leur dist : « Vous n’estes pas sage,
« Qui volés ceste part aler. »
On le laissa assés parler.
Pour ce ne s’en abstinrent mie
Li doi ; mais ont a ceste fie
Tant chevauciet qu’il sont venu,
Ou le dit passage ont veü
Et la loge ou li chevalier
Pooient tout le jour logier,
Qui ne desiroient riens el,
Fors de trouver en camp mortel
.I. chevalier ou .ii. ou trois,
Pour yaus combatre a ceste fois.
Tele estoit li affection
D’yaus tous, selonch m’entention.
ien avoient ja oÿ dire,
Dont il estoient en grant ire,
C’uns chevaliers estoit passés,
Qui estoit corageus assés
Et avoit le pas de la Garde f. 141 a
Conquis, et occis de sa darde
Monsigneur Panfris le vaillant ;
De quoy yaus en esmervillant
L’attendoient tout ce matin,
Et estoient prest leur ronchin
Et tout armé devant leur tente,
Page:Froissart - Méliador, tome 2.djvu/291
Le texte de cette page a été corrigé et est conforme au fac-similé.
287
Méliador
