Un certain nombre d’exemplaires de l’Armorial de la Table Ronde le présentent sous une forme abrégée, offrant une série de blasons figurés, avec description des dits blasons et l’indication des personnages auxquels ils étaient censés avoir appartenu. Mais en cinq manuscrits de la Bibliothèque nationale, cet armorial figure comme l’une des parties d’un livre sur les tournois de la Table Ronde, qui est l’œuvre d’un contemporain du roi René, et dont voici l’épître liminaire.
Pour ce que toutes bonnes meurs sont regies par vertus et que, en vertu, force est tres necessaire pour garder une chacune d’icelles, affin que les entendemens labeurent ung chacun selon sa vocation, les anciens pour entretenir ceste vertu de force toute leur entente misdrent en exercite d’armes, la ou ilz exposoient leur honneurs, vie et avoirs, pour quoy estoient les choses publicques maintenues, et seigneuries gouvernées en justice et les choses divines nourries en paix, a quoy tant de nobles hommes, directeurs de bonnes euvres, tant travaillerent que le nombre d’eulx ne des travaulx qu’ilz feirent sont a peine incongneuz et innumerables. Et, pour ce que assés sçay que mieulx le savez que moy, n’est ja besoing d’en nul particularizer ne alleguer, car je congnoiz, tres hault et tres puissant prince, mon tres chier et honnoré frere, prince de Vienne, que vous l’entendés et congnoissez moult clerement comme celuy qui voulentiers en telz choses vous delectez. Et encor pour tousjours vous adjoindre en toutes vertueuses choses necessaires en ce temps de paix et transquilité, faire joustes, tournoys et autres choses, qui apertient a tout avoir d’armes et a d’entretenement d’icelles, tellement que harnoys est si conjoinct et si amyable que a peine semble que toutes nobles euvres marciales soient nées avecques vous, que espoir est a tous nous, voz parens et amys, de grans choses de bien en adve-
