| 162 | L’ALCORAN. |
a creé des arbres & des nuës pour vous tenir à l’ombrage, il a crée les montagnes & les cavernes pour vous couvrir de la pluye, il a creé des veſtemens pour vous garder de la chaleur du ſoleil & de la rigueur du froid, il a accomply ſa grace ſur vous, peut-eſtre que vous vous reſignerez à la volonté de ſa divine Majeſté, & que vous profeſſerez ſon unité. ſi les infidelles ſe dévoyent le chemin de la loy, tu n’eſt obligé qu’à les preſcher intelligiblement, ils cognoiſſent la grace de Dieu & la meſpriſent, parce que la plus grande partie d’entr’eux ſont impies, preſche-leur le jour que je feray reſſuſciter toutes les nations du monde, & les Prophetes & Apoſtres qui leur ont preſché mes commandemens, il n’y aura point d’excuſe pour les infidelles, ils ne trouveront point de protection ny d’allegemens en leurs miſeres ; Lors qu’ils verront leurs Idoles, ils confeſſeront qu’ils eſtoient devoyez, ils cognoiſtront l’unité de ton ſeigneur, & que leurs idoles ne peuvent pas interceder pour eux. Dieu a augmente la punition des infidelles, il leur a envoyé mal ſur mal, parce qu’ils empeſchent le monde de ſuivre ſa loy ; Preſche leur le jour que je feray reſſuſciter toutes les nations du monde avec le Prophete qui les a preſchés pour eſtre teſmoin de leurs actions, je ſeray teſmoin contre ceux de ta nation, je t’ay envoyé le livre qui explique, les myſteres de ſa loy pour conduire le peuple au droict chemin, & pour annoncer les joyes de Paradis à ceux, qui profeſſent mon unité. Dieu ne vous commande de fai-
