| 466 | L’ALCORAN. |
celuy que Dieu devoyera ne trouvera pas le droict chemin ; Dis leur, demandez pardon à Dieu avant que le jour vienne que vous ne trouverrez point de chemin pour retourner au monde, n’y point d’excuſe de vos pechez ; S’ils te deſobeïſſent nous ne t’avons pas envoyé pour eſtre leur tuteur, tu n’es envoyé que pour les preſcher. Lors que nous donnons quelque proſperité à l’homme, il s’en reſjoüit, & lors qu’il luy arrive de l’affliction il eſt ingrat de la grace de ſon Seigneur Roy des Cieux & de Terre. Dieu donne des enfans fils & filles à qui bon luy ſemble, il rend ſteriles celles que bon luy ſemble, il ſçait tout & eſt tout-Puiſſant, il ne parle à l’homme que par inſpiration & par parabole ſans eſtre veu, il envoye ſes Prophetes & les Apoſtres auſquels il inſpire ce que bon luy ſemble, il ſçait tout & eſt tout-Puiſſant : Ainſi nous t’avons envoyé noſtre eſprit pour enſeigner nos commandemens, tu ne ſçavions pas auparavant, ce qui eſtoit eſcrit dans l’Alcoran, ny les myſteres de la foy, nous t’avons envoyé pour ſervir de lumiere au monde, je conduiray au chemin de ſalut qui bon me ſemblera, je le conduiray au chemin du Seigneur, à qui appartient tout ce qui eſt au Ciel & en la Terre & qui diſpoſe de toute choſe.
