| 480 | L’ALCORAN. |
LE CHAPITRE DE HECAF,
contenant trente-cinq verſets,
eſcrit à la Meque.
Hecaf eſt une valée au pays de Liemen ſur les frontieres d’Arabie. Voy Gelaldin, & le livre intitulé Kytab el tenoir.
U Nom de Dieu clement & miſericordieux. Dieu eſt tres-prudent tres-ſage. Ce livre a eſté envoyé par le tout-Puiſſant & Sage. Nous avons creé les Cieux & la Terre, & ce qui eſt entr’eux pour ſigne de noſtre unité & de-noſtre toute-Puiſſance, & avons ordonné à toute choſc un temps prefix & limité. Si les infidelles s’eſloignent de ce qu’on leur a preſché, Dis leur, avez-vous conſideré les Idoles que vous adorez, monſtrez moy ce qu’ils ont creé en terre, ſont-ils compagnons de Dieu en la creation des Cieux ? Apportez moy un livre envoyé du Ciel auparavant l’Alcoran, qui contienne comme luy ce qui eſt reſté de la doctrine de ceux qui nous ont precedés, nous verrons ſi vous eſtes veritables; qui eſt plus devoyé que celuy qui adore les choſes qui ne peuvent pas exaucer ſes prieres, ny le proteger au jour du Jugement ? Ce jour les infidelles ſeront ennemis les uns des autres, & les Idoles ne recognoi-
