Que lo coms de Cumenge ab bon captenement
En Dalmatz, en Pelfortz, Sicart de Poglaurens,
Am las belas companhas complidas de jovent
Establiro las lissas e lo defendement ;
E li autre s’en eison permiei los pons corrent,
Cavalers e borzes, e arquer e sirvent,
E tuit passeron l’aiga, que negus no s’atent.
Mas Rotgers Bernatz manda e capdela e defent,
En Rogers de Montant que venc primeirament,
El pros n’Ot de Tarrida e li ben defendent,
E perprendon la grava els ortz el cazament.
E lo coms de Montfort ab totz los sieus batent
Vengron permeg la vila de Sent Subra baten ;
E passan las trencadas tant afortidament
Qu’intreron per la grava e pels ortz dreitament ;
Mas en Miquels dels Armes a pres envaziment :
Gantiers de la Betona en Felip d’Aiguilent
Primeirament dels autres brocan en contendent.
N’Arnaut de Vilamur ab fin cor e valent
Los atent els espera aperceubudament,
E escrida sa senha e baicha e destent,
E fer .I. cavalier que l’abatec sagnent.
E dedins e defora feron l’acordament,
E escridan Tholosa ! e Montfort ! autament,
E lai on s’encontreron feiron lo chaplament.
Mas las lansas polidas e li bran resplandent
E li dart e las picas e li acier razent
E las peiras redondas e li espieut brandent
E las sagetas primas e li cairel punhen
— 7501-2. La répétition de batent à la rime est probablement fautive. — 7505. Cf. la note du v. 7338. — 7512. acordament, corr. acorament ?
