« Nos e vos e li autre em vengut al turment.
« Per qu’ieu ai gran temensa de prendre dampnament,
« Si tant pres de la vila prendam albergament. »
E li baro essems fan tal acordament
Que lotjas e caudeiras i laiseron ben cent,
E torneron areire mieja lega vertent,
E fiqueron las tendas desobrel paziment.
Elh baro de Toloza alegre e jauzent
S’en tornan en la vila.
Can tornan en la vila mandan als mesatgiers
Qu’ades Br. Paraire e maestre Garniers
Anols trabuquetz tendre e comensel chapliers.
Ez a las cordas tendre ac n’i be .X. milhers,
E mezon en las frondas los bels cairos grossiers,
El castel Narbones els portals frontaliers,
Els murs e las bertrescas els ambans meitadiers,
E de la tor Ferranda los verials primers
Abaton e trabucan e brizon a cartiers ;
Ez escridan : « Tholoza ! ara creis lo braziers,
« Qu’es anatz e vengutz lo nostre desiriers,
« Lo rics valens coms joves el sentier dreiturers ! »
Mas en breu de termini se mermec l’alegriers,
Que lo vens el troneire e l’aura el tempiers
Tres nogs totas entieiras e tres jorns totz entiers
Fetz deversar e ploure ab los elementiers,
Que tant crec la Garona que perpren los graviers
- ↑ — 7559. Bernatz en toutes lettres au v. 9424. — 7564. Ms. vertrescas. — 7568. Corr. Ques aras es v. ?
