C’avian li Frances conquerida primer,
Cazec la ensenha en l’aiga, el leos el gravier,
Dont tuit cels de la vila n’an complit joi plener ;
Ez aneron recebre lo comtel cavalier,
Els baros de la vila els bo[r]zes el viguer
E donas e borguezas, que n’an gran desirier ;
E no i remas piuzela en cambra ni en soler.
El pobles de la vila, li gran el menuzer,
Tuit remiran lo comte coma flor de rozer.
De lagremas joiozas, de joy e d’alegrier
Son complidas las plassas els palais elh verger.
E lo coms ab gran joya dechendec al mostier
Del baro sent Cerni, vertudos mercener,
Que anc no volc paria de Frances ni la quier.
Las trompas e li graile el corn el senharer
Els senhs e las esquilas, que brandichol cloquier
Fan retendir la vila e l’aigua el graver.
Ez amb aquela joya issiron .V. milher,
E perprendon las plassas sirvent e escudier,
Dreitament vas lo seti li corrent el leugier ;
En auta votz escridan : « Sa Robi, sa Gautier !
« A la mort ! a la mort Frances e bordoner !
« Que nos avem doblatz los pungs de l’esquaquier,
« Que Dieus nos a redut lo cap e l’hereter,
« Lo valent comte jove qui aportal brazer ! »
E lo coms de Montfort cant au lo reproer
El a passada l’aiga e venc a l’arener,
Ez anerol recebre siei baro domenger.
El coms se pres a riire e demanda et enquier :
« Senh’en coms, » ditz en Joris, « ara avetz parier
« Que porta sanc e glazi e flama e tempier,
Page:La Chanson de la croisade contre les Albigeois, 1875, tome 1.djvu/335
Le texte de cette page a été corrigé et est conforme au fac-similé.
[1218]
323
croisade contre les albigeois.