« Nos ha be totz essems lhivratz e amarvitz.
« Nos aurem la batalha senes totz contraditz
« E sera ben vencuda, quel coratges m’o ditz.
« Senhors, ara vos membre cum nos teno feblitz,
« Qu’en totas nostras terras a senhors apostitz,
« Ques ilh an mortz los paires e los efans petitz,
« Ez an mortas las donas e destruitz los maritz,
« Ez an mort tot Paratge e lor eish enriquitz,
« E nos fan ir pel setgle perilhatz e marritz,
« E nos cassan tot dia pels boscatges floritz.
« E, per santa Maria vergena emperairitz,
« Mais volh moiram ab armas o ab glazis forbitz
« No que ja semprens tengan abaichatz ni peritz !
« E si bens troban ara firens e afortitz
« Totz temps n’er mais Paratges ondratz e obezitz.
« E si m’en voletz creire pos los trobam aizitz
« Lo lor afar el nostre er aisi devezitz
« Qu’iferns e paradis aura dels esperitz,
« Que mais val mortz ondrada c’aissi vivre aunitz !
« Pero l’avers que i sia ni pres ni comqueritz
« Er be entre nos autres belament departitz. »
Trastuit essems escridan : « Ben o ditz ! ben o ditz !
« Cavalguem la batalha, que Dieus nos sera guitz ! »
E cavalgan essems trols an vistz e auzitz ;
Els castelas en Joris e n’Ancelmes aizitz,
E li Frances essems am bos cors endurzitz
Combatian la vila, lo cap e la cervitz,
Ez ab tant ilh salhiron e commensan los critz ;
E cant li Frances viron los senhals esclarzitz,
E la crotz e la penche el taur e la berbitz,
E las autras ensenhas dels baros enarditz,
E las bonas companhas que los an perseguitz,
Page:La Chanson de la croisade contre les Albigeois, 1875, tome 1.djvu/369
Le texte de cette page a été corrigé et est conforme au fac-similé.
[1218]
357
croisade contre les albigeois.
