Cant lo coms de Monfort fo en l’onor assis,
Que l’an dat Carcassona e trastot lo païs,
El fo mot echarratz e fo fortment pensis,
Car paucs volo remandre ab lui de sos amis.
Tuit li plusor s’en volo retornar vas Paris.
Las montanhas so feras els passatges esquis,
E no volon pas estre ins el païs aucis ;
Pero si n’i remazo no sai o .VIIII. o dis
De los plus autz baros e dels poestadis.
Ab lui remas Simos sobrenom de Saissis,
En Roberts de Pequi, Normans, so m’es a vis,
En Wles d’Encontre qui s’en pena totz dis
De son pretz eisaussar, fe que dei sent Danis,
En Guis lo manescals qu’es pros e afortis,
Roberts de Forsovila e Lambert de Creissis,
Rainers del Caudaro e Raolf cel d’Agis,
En Pons cel de Beumont, en Joans sos cozis,
E granda massa d’autres quels noms non ai apris,
El vescoms Centonges e en Rotgiers d’Andeles,
En Rogers de l’Issart en Uges de Lases.
Si eu fossa ab lor nils conogues nils vis,
Ni anessa ab lor pel païs c’an comquis.
Plus rics ne forai libres, ma fe vos en plevis,
E mielher la cansos.
- ↑ — 829. La réd. en pr. laisse supposer une leçon assez différente : .... e cascun tornats en son pays et terra, sinon alcus gentilhomes et autra gens, jusques al nombre de .IIII. mila .Vc., tant Borgoinons que Alamans et autra gens de par dela, que demoreguen angatjats an lodit comte de Montfort (p. 19).
