Si est couchiez desor le fein.
Tot maugré le nez au vilain
Qui iloc l’avoit aüné,
S’est Renart iloc reposé
Et dormi jusqu’au lendemein.
Quant il s’esveilla, si vit plein
Le pré d’eve entor le mulon :
Ha ! Dex, fait Renart, que feron ?
Con par est cele eve créue !
Einz que ele soit descréue
Serai ci, ce cuit, mort de fein.
Atant voit venir un vilein
Qui ameine une nef aval.
Dex, dit Renart, l’esperital !
Iceste nef me getera
A cele rive par delà.
Li vilein a Renart véu,
Sitost con l’a apercéu,
Dex ! fet-il, quel beste est cela
Qui desor ce mulon esta ?
Con il fu un poi avalé,
Si li a Renart escrié :
Vilein, vilein, ce dit Renart,
Ameine çà, se Dex te gart,
Cele nef, si me met dedenz.
Volentiers, Renart, par mes denz,
Fet li vilein, je la vos meing,
Mès venez jus desus cel fein.
Page:Le Roman du Renart, 1826, tome 3.djvu/125
Le texte de cette page a été corrigé et est conforme au fac-similé.
