Mès c’aie mangé cest chapon.
Li Vileins s’en vet de randon
O tot la nef que il enmeine,
Et Renart de mangier se peine
Le chapon qui est gras et gros.
Les autres a mis sor son dos,
Si en vet, que plus n’i demore.
Moult li avint bien à cel ore,
Que de tot le jor n’ot mangié
Et si avoit moult traveillié.
Errant s’en vet les granz trotons,
Sor son dos porte les chapons,
Si s’en va par la terre gaste
Tot belement et tot sanz haste.
S’en va tant que fu près de nuit,
Un chapon manga tot descuit
Enmi les chans desoz un teil :
Onques la nuit ne clot son eil
Por le grant travail qu’ot éu.
Et quant le jor esclarci fu,
Si se mist tantot el troton,
Mès ançois manga son chapon
Tot belement et tot en pès,
Et puis s’en va à grant eslès
Trestot contreval un prael.
Atant a trové Roonel
Le mastin qui va querant proie.
Renart le voit, moult s’en esmoie,
Page:Le Roman du Renart, 1826, tome 3.djvu/133
Le texte de cette page a été corrigé et est conforme au fac-similé.
