Li sont dedens la char entré.
Tant s’est li messagiers hasté
Que par la porte entre en la cort,
Descenduz est et puis s’en cort
El paleis trestot meintenant,
Renart salue tot avant
Et puis en après la Roïne
Conme cortoise et enterine,
Et dit : Dame, salus vos mande
Li Rois et as barons conmande
Que il facent lire cest brief,
Et si vos di bien par mon chief
Qu’il est en la bataille ocis.
Ocis ! dist Renart, las caitis !
Est donques morz li Rois mi sire !
A cest mot li saut sanz plus dire,
S’el fiert d’un baston si forment
Que la cervele li espant,
Mort l’abati enmi la place.
Tais-toi, dist Renart, Dex ne place
Q’einsi aion le Roi perdu.
Savez por coi il l’ot feru ?
Por ce, sachiez de verité,
Que par lui ne fust encusé ;
Moult par fu veziez. En apert
Le brief prent, s’el bailla Tybert
Le Chat, voiant toz les barons,
Et Tybert lieve les gernons,
Page:Le Roman du Renart, 1826, tome 3.djvu/263
Le texte de cette page a été corrigé et est conforme au fac-similé.
