Page:Le Roman du Renart, 1826, tome 4.djvu/180

Que venés véoir mon castiel.
1150Alons, dist Orghius, ce m’est biel.
Renart en Malpertuis le maine
Partout, et il ne li fu paine
Del aler, ains dist que castiel
Ne set el monde nul si biel,
Ne si fort ne si aaisié.
De çou ot Renart le cuer lié ;
A Orguel dist Renart, venés,
Encore autre cose verés,
Une maison le plus diverse
1160Ki soit de chi dusques en Perse.
Renart Orguel en se maison
Maine, ki ert de traïson,
De haïne et d’envie ouvrée ;
De boisdie estoit li entrée
Et de blades li pavemens.
De toutes manieres de gens
Avoit Renart laiens od lui,
Nel’ aroie parnonciet hui
La joie que à Orguel font
1170Contre lui. Encourtiné ont
De dras d’or le maison trestoute.
Encontre Orguel fors d’une croute
Vinrent sis Dames noblement,
Vesties d’or moult ricement.
Encontre Orguel viennent cantant
Deus et deus main et main tenant ;