Le texte de cette page a été corrigé et est conforme au fac-similé.
Si ke Renart et Rois Nobles s’entrebaisent par pais faisant.
Entre Renart et Roi Noblon
Et toute li os à bandon
S’entrebaisent par grant concorde ;
A tous les barons fist acorde
Renart et si très ferme pais
Ne puis véoir gerre i ait mais,
Car tuit sunt devenu louviel
Cil ki soloient estre agniel.
Li Clergiés ki nos déust paistre
De boines œvres com boins paistre,
Et mener en france pasture,
N’ont mais de tele cose cure ;
Puans luxure et gloutenie
Et couvoitise est iaus amie.
Il nous dient, ciessés d’embler,
Et il vont méismes reuber.
Il nos loent humelité,
Et il ont orguel en cierté.
Li Leu puéent ore estre cras,
Et de nos brebis lor degras
Faire, no pastre ont lor véue
Au jour d’ui priès toute perdue.
