Et bien la tiere deffendue
Encontre la gent mescréue,
Et le deffendent au jour d’ui.
Saint Peres, pour no maison sui,
Renart demandomes, Sains Pères,
Por estre maistres gouverneres
De nous et de nostre maison,
Bien savés que je di raison.
Lors li Papes li respondi :
L’un de vous deus i a failli,
Partir ne se puet mie en deus.
Renart respont adonc as deus,
S’iert uns prestres, jou si ferai,
Les deus abis je viestirai,
Mes viestimens sera partis,
A diestre je serai viestis
De viestement d’Ospitelier,
Et à seniestre de Templier.
A seniestre barbe lairai,
A diestre rere le ferai,
Bien les gouvernerai tous deus.
Adont i ot grant joie entr’eus,
Viesti l’ont si c’avés oï.
Li Papes les en raviesti,
A Renart ont fait sierement
K’il feront mais à son talent.
Lié sunt c’avoec eus est Renart,
Lors est li parlemens espars.
Page:Le Roman du Renart, 1826, tome 4.djvu/464
Le texte de cette page a été corrigé et est conforme au fac-similé.
