Dedens son cuer ains qu’il déist
Chose nule qui despleuist
A lui ne à home des siens.
Dame, dame, de çou est niens,
Li vostre afaire petit vaut,
Dist Ysengrins ; à pau s’en faut
De vostre chief les lens ne conte :
Que vos aiiés maloite honte
Quant vos encor venistes hui !
De cesti eut li Rois anui
Et dist : coment, sire Isengrin,
Volés-vos ci endroit hustin
Movoir en la moie présence ?
Jou vos ai dit en audience
Que vos Renart m’alés querant,
Et vos ci alés laidengant
Une Dame de haut linage,
Sachiés ne vos tieng mie à sage.
Alés-vos où je vos ai dit,
N’i metés mie contredit.
Sire, dist-il, jou n’irai pas,
Un autre i envoiiés le pas
Ou les galos ou l’ambléure,
Car jou mie ne l’aséure
De quele eure que soiiés mors.
Ha ! dist li Rois, come t’ies amors
De mauvestié et outrageus !
Sire Lupart, n’est mie geus,
Page:Le Roman du Renart, 1826, tome 4.djvu/82
Le texte de cette page a été corrigé et est conforme au fac-similé.
