Le texte de cette page a été corrigé et est conforme au fac-similé.
Amours
Recongnoys les biẽs que nature
Ta donne et ſi largement
Faite ſi belle creature
Que ceſt ung grant engagement
Si que non au grant iugement
En rendras compte et reliqua
Il fault garder le rebeca
Honte
Tant plus ta nature formee
De toutes uertuz acomplie
Tant plus tu dois eſtre informee
Et de treſtous grans biens remplie
Se ton cueur a mal faire plie
Ton compte ne ſera pas bon
Qui uolee a nattende bon
Amours
Se nulle neuſt aime iamais
Je ne ten uoudroye ſemondre
Ne teſmouuoir a cecy mais
Les grandes ten peuent reſpondre
Toutes aiment ſans en eſcondre
Une tant ſoit haulte princeſſe
Quant uiẽt leſte le primtẽps ceſſe
