Le texte de cette page a été corrigé et est conforme au fac-similé.
Amours
Se nature ſe ueult forfaire
Dame raiſon eſt par deſſus
Pour la corriger et retraire
Affin quil nen ſoit pas deceuz
Pource peut on et ius et ſus
Qui reſister ueult ſi maiſt dieux
Raiſon domine ſoubz les cieulx
Honte
Qui ſeroit ſeur de la raiſon
On pourroit tout auenturer
Mais ueoir bruler autruy maiſon
Fait pour la ſienne procurer
Que feu ny puiſſe paſturer
Et quelle ne ſoit deſbaſtie
Sage par autruy ſe chaſtie
Amours
Chaſcũ ſcet biẽ ce neſt pas bourde
Que pucelle qui na amy
Toute ſa uie eſt ſotte et lourde
Et ne ſcet ne bien ne demy
Et touſiours a lueil endormy
Sans peu de contenance auoir
Ceſt belle choſe que ſauoir
b
