eſtoit ce brauache, & ſe ſouſriant il me demanda ſi i’eſtois encores ſi badaut que ie ne cogneuſſe pas le Seignor intereſt particulier ſi aymé, & ſi reueré de tous, hors mis des Financiers. Et luy demandant ſi ce Rodomont eſtoit marié, il me dit qu’il auoit eſpouſé Madame la Paulette, dont il eſtoit deſia ſorti tout plein d’enfans pour l’adminiſtration de la iuſtice. Sur cela arriua de bonne fortune, que le Roy reuenant de la chaſſe, & voyant le monde aſſemblé deuant l’Egliſe, demanda ce que s’eſtoit. Le Curé priſt lors la parole, & dit c’eſt (SIRE) ce bon homme qu’on appelle le Bien Public, & lequel ie recommande tous les Dimanches à mon proſne, qui a eſté ſi outrageuſement battu & excédé par Móſieur l’intereſt particulier, qu’à peine il peuſt ouurir la bouche pour faire ſa plainte à voſtre Majeſté, eſtendu comme elle le voit ſur le carreau, & n’a les mains iointes que pour implorer voſtre miſericorde. A quoy ce Prince debonnaire teſmoigna deſtre touché de pieté, & conſolant ce bon homme luy dit gracieuſement courage mon pere, releuez vous ie vous veux aſſiſter & auoir ſoin de vous.
