Lucifer fut moult bel et de telle ſtature quoy ſont les aultres bons angelz et ne demoura mye aux cieulx par leſpace de une heure Car il ſe enorguillit en regardant et contemplant ſa belle grant beaulté en la quell̃ il fut fourmé et touz ceulz qui furent panſſantz mal avecq luy furent gectés en enfer en cõfuſion et faict led. Lucifer ſellon q̃ dient les docteurs de nigromance et led. Lucifer preſide en enfer et touz leſd. eſperitz denfer oboyſſans aluy cõme ſouverain denfer
Gay grant et maulvais eſperit eſt appell̃ bezlebuth et fut appell̃ devant le temps de Salomon anthaon et eſt le plus grant denfer apres Lucifer et doibt on ſavoir quil regne aux parties dorient et celuy qui lappelle doibt tenir ſon viſaige vers orient et il aparoiſtra a luy en belle figure et ſemblance Il enſeigne toutes ſciences et donne or et argent a ceulx qui le contraignent a venir et donne vroye reſponce de ce que on luy demande et revele les ſecretz denfer ſi on luy demande et ẽſeigne veritablement les choſes mucees en terre et en mer et ſi magnifeſte touz treſors qui ſont en terre repoſantz et garde des aultres eſpritz et doibt eſtre appelle par beau temps
Le tiers eſperit eſt appelle Satan Lequel fut fourme apres lucifer et converſe en lair pres de nous Jceluy ſathan appiert en gracieuſe ſemblance et habite en ſeptẽtrio. Celuy qui lappelle Doibt avoir ſon viſaige vers ſeptentrion Jcelluy apiert et a puiſſance de defformer touz homes et femmes ſe on Luy cõmande et ſe apparoille a faire touz maulx ſi luy eſt cõmande
Des quatre eſperitz principaulx ſeront dits Les offices en ceſte partie, dont le premier enſuit
Sequitur de primo
Le premier eſt appelle Orient et habite en orient Il tient le nom De la partie du monde
Pro ſecundo
Le ſecond eſt appelle Poymon et habite en occidẽ
Pro tertio
Le tiers eſt appelle Amoymon et habite es parties meridionales
Pro Quarto
Le quart eſt appell̃ Equi Et habite es parties De ſeptentrion
