Et ainſi com j’y demouray,
Ma dame ne s’oublia mie ;
Ains miſt ſus une chevauchie
De dames & de damoiſelles
Cointes, gentes, juenes & belles,
Pour moy véoir & viſeter,
Et de merencolie geter.
Mais onques-mais ne vi pour voir
En ma vie ſi fort plouvoir.
Si vinrent tout droit à l’égliſe
Qui n’eſtoit pas de terre gliſe,
Ainſois eſtoit de pierre dure,
À grans pilers, à grant volture.
Lors vint mon ſecretaire à moy
Et diſt : « Sire, par Saint Eloy,
« Vez-la vo dame, ce m’eſt vis,
« À ce gent corps, à ce cler vis. »
Et je ne me fis pas prier
D’aler vers li ſans detrier.
Si vi tantoſt que c’eſtoit celle
Cui je mis à non Toute-belle.
Mais illec petit ſejourna,
Car en l’eure s’en retourna,
Pour l’amour de ſes compagnettes,
Qui eſtoient ſur eſpinettes,[1]
Pour doubtance de leurs maris,
Qui ont touſdis les cuers marris,
Quant elles ſont en compagnie,
Où l’on meine joieuſe vie ;
Voire s’il le puelent ſavoir.[2]
Page:Machaut - Le Voir Dit, 1875.djvu/163
Le texte de cette page a été corrigé et est conforme au fac-similé.
[vers 2624]
109
DU VOIR-DIT.
