« Ne que vault terre, ſans ſignour
« Qui ne la vuet mie deffendre,
« Quant il la voit pillier ou prendre ?
« Molins oiſeus, fours qui ne cuit,
« Il ne valent guères, ce cuit.
« Et ſe tu avoies, tres-or,
« De ce monde tout le treſor,
« Et cent fois le jour l’aouraſſes,
« Ne departir ne l’enduraſſes,
« Il ne te vaurroit une ortie ;
« Et ſi, ſeroit ydolatrie.
« Car li treſor pas ne deffendent
« Les royaumes quant il contendent ;
« Mais bons amis le font de fait.
« Sages eſt qui tel treſor fait.
« Qu’on dit : mieus vault amis en voie,
« Que ne font deniers en courroie.
« Ne te conſeille par merdaille,[1]
« Qu’il ne valent rien en bataille ;
« N’à garſons, car, ſe tu les crois,
« Je te jur ſur toutes les crois
« Qui furent en Jheruſalem,
« Il te mettront en ſi mal an
« Que tu n’i porras conſeil mettre,
« Par cop d’eſpée ne par lettre.
« Mais tu ies ſages & ſubtis,
« Larges, courtois, nobles, gentis,
« Si que d’eus bien te garderas,
« Et aus bons te conſilleras,
« Qui metteront corps & avoir
« Ad ce qu’honneur puiſſes avoir.
- ↑ Que la lie du monde (la merdaille) ne te conſeille.
