Tout ce que nous avions conté
Entre moy & mon ſecretaire ;
Et qu’il véoit moult bien l’affaire,
Le deſir qu’avoie & l’envie
De véoir ma dame jolie ;
Et qu’il le me penſe à deffendre,
Se véoir le vueil & entendre.
Et je qui l’amay & doubtay
Moult diligemment l’eſcoutay.
Lors diſt : « Amis, ſe je ſavoie
« Voſtre grant bien, je le vourroie
« Croiſtre, eſlever & eſſaucier,
« Et voſtre dommage abaiſſier ;
« Car certes vous avez en my
« Un tres-vray & loial amy.
« Et, pour ce, vous vueil deviſer,
« Seulement pour vous adviſer,
« Comment li ancien entailloient
« L’image d’Amour, ou paignoient. [App. LXXVII.]
Il faiſoient un jouvencel
« D’entailléure ou de pincel,
« Si bel de corps ou de viaire
« Com main de ſubtil le puet faire,
« Son chief avoit tout deſcouvert,
« Fors que d’un chapelet tout vert[1]
« Qui eſtoit moult bel & moult gent.
« Lettres avoit d’or ou d’argent
« En front, diſant par amiſté :
« Et en yver & en eſté.
- ↑ Une couronne, un bandeau.
