Le texte de cette page a été corrigé et est conforme au fac-similé.
81
L’INQUISITEUR
Clèrot.
A tous enfans elle est congneue,
Et vous ne sçavez où elle est ?
L’Inquisiteur.
Est il Gentil homme ou Marchant,
Ou si Mécanicque peult estre ?
Thiénot.
Ne l’allez poinct ainsi cherchant,
Car vous ne le pouvez congnoistre.
L’Inquisiteur.
Mais est il père de vous tous,
Ou bien si chacun a le sien ?
Janot.
Nostre père est, entendez vous ;
Héritiers sommes de son bien.
L’Inquisiteur.
S’il a de quoy, il a grant tort
Qu’il ne vous mect à noz estuddes ;
Pérot.
Nostre partaige & nostre sort
Tenons seur sans solicitudes.
L’Inquisiteur.
Voici des responses bien fines ;
Savoir fault qui leur a apprises ;
Jacot.
Monsieur, j’ay veu ung plat de guynes
Où les plus rouges estoient prises.
