Néer se volt, la neif trova,
Dedenz entra, à cel port vint,
E li Chevaliers la retint ;
Gardée l’ad à grant honur,
Mês tusjurs la requist d’amur.
Ore est sa joie revenue,
Amis, menés ent vostre Drue.
Gugemer s’est en piez levez ;
Seignurs, fet-il, or escutez.
J’ai ci m’amie counéue
Ke jeo quidoie aveir perdue ;
Mériadus requier et pri
Rendez le mei, Sire, merci ;
Ses humes liges devendrai[1],
Deus u treis anz le servirai,
Od cent Chevaliers u od plus.
Dunc respundi Mériadus ;
Gugemer, fet-il, biax amis,
Jeo ne sui mie si surpris,
Ne si destreis par nule guerre
Que de ceo me deiez requerre,
Jeo la trovai ; si la tendrai
Encuntre vus la deffendrai.
Quant il l’oï, hastivement
A fait munter tute sa gent[2]
D’iluec se part, celui deffie,
Mult est dolans qu’il laist s’amie.
En la vile n’out Chevalier
Page:Marie de France - Poésies, éd. Roquefort, I, 1820.djvu/126
Cette page a été validée par deux contributeurs.
110
LAI DE GUGEMER.
