Mut par est Eliduc haitiez,
Unc nul jur ne fu si liez.
La Pucele baise suvent,
E ele lui mut ducement,
Ensemble funt joïe mut grant,
Quant la Dame vit lur semblant,
Sun Seignur ad à reisun mis,
Cungé li ad rové è quis,
Que le puisse de li partir,
Nunnein volt estre Deu servir ;
De sa tère li doint partie,
U ele face une Abéie ;
Cele prenge qu’il aime tant,
Kar n’est pas bien ne avenant,
De deus espuses meintenir,
Ne la lei nel’ deit cunsentir.
Eliduc li ad otrié
E bonement cungé doné,
Tute sa volenté fera,
E de sa tere li durra
Près del chastel einz el boscage,
A la chapele al hermitage,
Là ad fet fère sun muster,
Ses méisuns édifier,
Grant tere i met è grant aveir,
Bien averat sun estuveir.
Quant tut ad fet bien aturner,
La dame i fet sun chief veler,
Page:Marie de France - Poésies, éd. Roquefort, I, 1820.djvu/496
Cette page a été validée par deux contributeurs.
480
LAI D’ELIDUC.
