Puis l’afula è si li rent.
Par la main senestre la prent,
Des autres dex l’a eslungié ;
D’amors la requise è proiié
E que de lui face son dru.
E ele li a respundu :
Ge ! tu quiers grant utrage,
Ge ne te tieng noient pur sage,
Durement me doi merveiller,
Que m’oses de çou araisnier.
Tu ne dois estre si hardis,
T’en sereis tost malbaillis ;
Jà n’afiert pas à tun parage
Nule femme de mun lingnage.
Graelent la truve si fière
E bien entent que par proiière
Ne fera point de sun plaisir,
N’il ne s’en veut ensi partir :
En l’espèse de la forest
A fet de li ce que li plest.
Qant il en ot fet sun talent,
Merci li prie dolcement
Que vers lui ne soit trop irée,
Mais or soit et france et sénée,
Si li otroie sa druerie,
E il fera de li s’Amie ;
Loialment è bien l’amera,
Jamès de li ne partira.
