Cele li conte tout et dist
Comment el vergier s’endormist ;
Et comment il fu de-si là
Et comment dormant le trova.
Quant il ot trestout escouté,
Un regart fist oltre le Gué,
Et voit venir un Chevalier
Lance levée por guerroier,
Ses armes sont toutes vermelles,
Et del’ cheval les deus orelles ;
Et li autres cors fu tous blans,
Bien fu estrois desos les flans,
Mais n’a mie passé le Gué,
De l’autre part s’est arresté.
Et li Dansiaus dist à s’Amie
Que faire vieut Chevalerie ;
D’illuec se part, pas ne se mueve,
S’autel cheval sa joste trueve,
Mais primes pense à lui aidier ;
De l’autre part à l’estrivier,
Tant com cheval puet randir,
Grant cols se vont entreférir
Enson le vermés des escus,
Qui tous les ont frais et fendus.
Les hantes furent de quartier,
Sans mal metre et sans empirier ;
Se se versent endui el sablon,
Ni orent per ne compaignon,
