Son destrier i aresne li frans Aiols,
Et l’escu et le lanche drecha desous.
Puis entra el moustier de Sainte Crous,
Devant l’autel se mist a genollons,
Dameldé reclama par ses sains nons :
« Glorieus sire pere, » che dist Aious,
« Qui el cors de la Vierge fustes tan[s] jors
« Et venistes en tere, che fu por nous ;
« De li fustes vos nés, bien le savons,
« Par dedens Beleem sor .i. peron ;
« Issi com che fu voirs, bien le creons,
« Que rois estes et sire de tout le mont,
« Si faites a mon pere procain secour
« Que je laisai malade(s) et besongous
« Et molt povre de dras et soufraitous,
« Qui est avoec l’ermite el gaut parfont :
« Sainte dame benoite, je en pri vous ! »
Or fu Aiol[s] li enfes [ens] el moustier
Devant le maistre autel agenolié[s],
Dameldé reclama le vrai del ciel :
« Dameldé, » dist il, « pere [le] droiturier,
« Qui la mer et le mont peus justichier
« Et le ciel et le terre as a baillier,
« Tu me garis de mort et d’enconbrier,
« Et me done aventure par te pitié,
« Que je puisse mon pere encore aidier
« Et resvider ma mere qu’en a mestier :
« Dame sainte Marie, vous m’en aidiés ! »
Quant Aiols ot Jhesu trés bien proié,
Puis sacha de sa borse .iiii. deniers :
Sor l’autel les a mis li chevaliers
Par non de sainte offrande molt volontiers.
Or sont li .iiii. sol desparellié(s)
Que Elies ses peres li ot bailliés.
Encore ot il .iii. sous et .viii. deniers
Et un bessant d’or mier bien enforcié
