plaisant, ie feray planter sur la voûte d’iceluy plusieurs arbrisseaux portans fruits, bons pour la nourriture des oiseaux, et aussi certaines herbes, desquelles ils sont amateurs de la graine, à fin d’accoustumer lesdits oiseaux à se venir reposer et dire leurs chansonnettes sur lesdits arbrisseaux, pour donner plaisir à ceux qui seront au dedans dudit cabinet et iardin, et le dehors dudit cabinet sera massonné de grosses pierres de rochers, sans estre polies, ni incisees, à fin que le dehors dudit cabinet n’aye en soi aucune forme de bastiment : et en massonnant le dehors dudit cabinet, i’ameneray vn canal d’eau, lequel ie feray passer au dedans de la muraille, et estant ainsi massonné dans le mur, ie le dilateray en plusieurs parties de pisseures, qui sortiront par le dehors dudit cabinet, en telle sorte que ledit cabinet ressemblant vn rocher, on pensera que lesdites pisseures sortent dudit cabinet, sans aucun artifice, à cause que le dehors d’iceluy cabinet semblera vn rocher, et lesdites pisseures estans cheutes, se rendront à vn certain lieu, que ie te diray cy apres : mais ie te veux premierement discourir la beauté du polissement du dedans du cabinet. Quand le cabinet sera ainsi massonné, ie le viendray couurir de plusieurs couleurs d’esmails, depuis le sommet des voûtes, iusques au pied et paué d’iceluy : quoy fait, ie viendray faire vn grand feu dedans le cabinet susdit : et ce, iusques à temps que lesdits esmails soient fondus ou liquifiez sur ladite massonnerie : et ainsi, les esmails en se liquefiant, couleront, et en se coulant s’entremesleront, et en s’entremeslant, ils feront des figures et idees fort plaisantes, et le feu estant osté dudit cabinet, on trouuera que lesdits esmails auront couuert la iointure des briques, desquelles le cabinet sera massonné : et en telle sorte, que ledit cabinet semblera par le dedans estre tout d’vne piece, parce qu’il n’y aura aucune apparition de iointures : et si sera ledit cabinet luisant d’vn tel polissement, que les lezars et langrottes qui entreront dedans se verront comme en vn miroir, et admireront les statues : que si quelqu’vn les surprend, elles ne pourront monter au long de la muraille dudit cabinet, à cause de son polissement, et par tel moyen, ledit cabinet durera à iamais, et n’y faudra aucune tapisserie : car sa parure sera d’vne telle beauté, comme si elle estoit d’vn iaspe, ou porphire, ou calcidoine bien poli.
