raison est, parce que lesdits oisillons trouueront ordinairement quelque chose à se repaistre ausdits arbrisseaux : aussi pour mieux les accoustumer en ce lieu, ie ietteray en temps d’hyuer des graines de plusieurs semences sur l’allee, gallerie, et plate-forme susdite, à fin que les oiseaux trouuent quelque chose à manger en ce lieu, lors que l’hyuer aura rendu les arbres steriles. Voila comment en tout temps lesdites chambres hautes insculpees dedans les rochers, seront vtiles et de grande recreation. Et outre ces choses, les accotouërs qui seront erigez deuers le costé du iardin, seront grandement vtiles à faire meler les pruneaux, guignes, serises, et autres tels fruits qu’on a accoustumé faire meler au Soleil, parce que ce lieu sera orienté en telle sorte, que le Soleil y enuoyera ses rayons tout le long du iour : car le regard desdits rochers, chambres, et galleries seront vers le costé du vent d’Es et Sus. Et voila comment ceux qui auront affaire à estudier, distiller, ou autres labeurs esdites chambres hautes, quand ils voudront se recreer, ils sortiront sur ladite plate-forme et gallerie, et en se pourmenant, ils auront les arbrisseaux, et les oiselets au dessus de leurs testes. Et apres, voulans regarder toute la beauté du iardin, ils se viendront appuyer sur l’accotouër, qui sera fait exprés, et propre pour cest affaire, et estans la accotez, ils verront entierement toute la beauté du iardin, et ce qui s’y fera : Aussi ils auront la senteur de certains damas, violettes, marjolaines, basilics, et autres telles especes d’herbes, qui seront sur ledit accotouër, plantees dedans certains vases de terre, esmaillez de diuerses couleurs, lesquels vases, ainsi mis par ordre, et esgalles portions, decoreront et orneront grandement la beauté du iardin et gallerie susdite. Aussi au dessus desdits accotouërs, il y aura certaines figures feintes, insculpees de terre cuite, et seront esmaillees si pres de la nature, que ceux qui de nouueau seront venus au iardin, se descouuriront, faisans reuerence ausdites statues, qui sembleront, ou apparoistront certains personnages appuyez contre l’accotouër de ladite gallerie et plate-forme : or pour monter sur ladite plate-forme il y aura deux escaliers, l’vn deuers le costé du vent de Nord, et l’autre deuers le costé du vent de Sus, et seront lesdits escalliers taillez de la mesme roche, et sur le mesme lieu, qui sera vne beauté
