trempé en l’eau d’alun ne le pourra faire. Le sel donc est vne chambriere qui oste la couleur à l’vn pour la bailler à l’autre. Aucuns sels endurcissent le fer et le trenchant des armes, en telle sorte que on en coupe du fer comme si c’estoit du bois. Ie ne suis point capable de descrire l’excellence des sels, ny leurs vertus merueilleuses : toutesfois en parlant des pierres i’en diray quelque chose de ce qui aura esté oublié, aussi que l’on ne sçauroit traiter d’icelles sans parler quelquesfois des sels.
Il y a long temps que tu parles des sels, mais iusques icy tu n’as point dit vn mot de la definition de sel, et toutesfois c’est le principal que d’entendre que c’est que sel.
Ie n’en sçaurois dire autre chose sinon que le sel est vn corps fixe, palpable, et conneu en son particulier, conseruateur et generateur de toutes choses, et en autruy, comme és bois et en toutes especes de plantes et mineraux. C’est vn corps inconneu et inuisible, comme vn esprit, et toutesfois tenant lieu, et soustenant la chose en laquelle il est enclos, et si iamais il ne sentoit d’humidité, plusieurs choses, où il est enclos, seroyent perpetuelles : comme le sel qui est au bois empescheroit qu’il ne pourriroit iamais : et s’il ne receuoit aucune humidité, il ne s’engendreroit iamais de vers dans ledit bois : Car iamais ne se peut faire de generation sans qu’il y ait vne humeur eschaufée par putrefaction. Si le foin, la paille et choses semblables estant bien seichées, sans receuoir aucune humidité, estoyent gardées en lieu sec, ils seroyent perpetuels par la vertu du sel qui y est. Il y a aucuns sels lesquels estant és lieux secs tiennent la forme qui leur aura esté donnée, et estants mis en lieu humide se reduisent en huile, desquels le Tartare est vn, et le sel de salicor vn autre. Ce point bien entendu peut beaucoup aider à l’intelligence des propos que i’ay tenus en parlant de la generation des metaux : parlant il est de besoing que tu entendes bien le tout : par ce que toutes ces matieres sont si bien concatenées ensemble, que l’vne donne intelligence de l’autre.
