Le texte de cette page a été corrigé et est conforme au fac-similé.
EXPLICATION
DES MOTS PLUS DIFFICILES.
_p_0425.jpg)
crimonie, s’entend des choses mordicatiues, qui picquent la langue : comme aucunes especes de sels, comme la couperose, ou vitriol.
Additions, sont les matieres adioustées és pierres et metaux, congelées et attachées à diuerses fois à la premiere masse.
Aigres, sont choses qui se cassent aisément auec vn marteau.
Alizes, sont les choses serrées, comme le caillou, et le pain broyé, auquel n’a esté donné lieu de se leuer, et toutes choses qui sont si bien condencées qu’il n’y a aucuns pores apparents.
Alterées, sont les pierres imparfaites, comme la craye, le plastre, et toutes pierres legeres, ausquelles l’eau a deffailly au parauant leur parfaite decoction.
Amalgame, est appellé par les Alchimistes l’or, quand il est dissout, et entremeslé auec le vif argent.
Antimoine, est vn metal imparfait, commencement de plomb et d’argent.
Appositions, sont les matieres terrestres entremeslées, lesquelles se mettent entre deux congelations des pierres et metaux, et rendent en cest endroit la masse plus tendre et impure.
Aqueducs, sont les conduits d’eau, pour lesquels les antiques faisoyent plusieurs arcades, pour conduire les eaux.
Attraction, s’entend d’attirer la teinture ou la vertu de quelque chose, comme l’eau bouillante attire la couleur du bresil, et l’alun attire la saliue de l’homme.
Bitumen, est vne espece de poix, de laquelle on gresse les nauires pour resister à la pourriture : et combien qu’aucuns
