AU LECTEUR.
Si je n’allegue nul autheur,
Mais seule vraye experience ;
Diras-tu mon liure menteur,
Ou qu’il en ait quelque apparence ?
Tout homme de bonne science
Le lisant iugera fort bien
Que ce qu’ay mis en euidence
Est veritable, et faict pour bien.
À L’AUTEUR.
Les Anciens ont fort parlé d’Apis,
Et d’Esculape experts en Médecine.
La mort du tout ne les a assoupis,
Car seulement, le corps elle ruine ;
Mais leur sçauoir, bruit immortel s’assigne,
Or qui voudra voir ton art tout exprès,
Il cognoistra que nature divine,
Les sus nommés te fait suyure de près.
UN AMY À L’AUTEUR.
Les Médecins ne seront par raison
Si grandement de ton liure offencez,
Comme ont esté par lourde desraison
Les Pharmatis outragez et blessez,
Premierement, mais non pas trop froissez.
Benancio son salaire reçoit,
Benancio ha bien ici assez
De payement : ou mon sens me deçoit.
