que vous eſtes vn des plus beaux Aſtres de la Cour, & toutes les adorations, & les vœux qu’il luy rend, n’empeſchent pas qu’il n’ait pour vous l’admiration qu’en a des-ja vne partie de la Terre, & qu’il n’aduoüe, que la nature a formé en vous quelque choſe de celeſte, puiſque elle n’a non plus eſpargné à vous rendre conſiderable par voſtre illuſtre, & haute naiſſance, qu’elle s’eſt monſtrée prodigue à departir toutes ſes graces en voſtre perſonne, vous rendant vn Miracle de noſtre Sexe. C’eſt par cette raiſon MADEMOISSELLE, qu’Endymion a cherché l’honneur de vous apprendre les auantures ; que ſi elles ſont aſſez heureuſes, pour trouuer quelque petite place dans voſtre eſtime : il pourra dire, que la gloire d’eſtre aymé d’vne Deeffe, ne luy eſt pas plus auantageuſe, puiſque vous luy permettez de voir le iour : il pour-
