Elle m’a ſatisfait : ce bel Aſtre diuin,
Iſmene, c’eſt Diane.
He quoy ! tu l’as donc veuë ?
Ouy i’ay veu les attraits dont le ciel la pourueuë.
Heureux Endymion, que peux tu ſouhaitter
Apres vn tel bonheur ?
De touſiours preſenter
Mes deuoirs & mes vœux, & de finir ma vie,
Pour ce rare ſubiet qui m’a l’ame rauie.
Mais encor, ſage Iſmene, honneur de l’Vniuers,
Puiſque ton art fait tant de miracles diuers,
Qu’on te nomme par tout la Merueille des femmes,
Que l’on te voit loüer par les plus belles ames,
Ne ſuis ie pas heureux de te trouuer icy,
Pour te prier encor de m’oſter de ſoucy.
Et quel eſt ton ſoucy, dis moy, que tu ſouhaittes ?
Sçaches qu’à te ſeruir les Iſmenes ſont preſtes :
Deſpeche promptement de me le faire ouyr.
Helas ! c’eſt que le bien dont ie viens de ioüir,
N’eſtant pas de durée, eſtant vn peu trop rare,
Ie vois que pour long-temps ce plaiſir ſe prepare :
Et que ſi i’ay ioüy d’vn plaiſir ſi parfait,
Peut eſtre que mes vœux n’auront plus tant d’effet :
Ne puis ie encor trouuer quelque endroit fauorable,
Afin d’y contempler cet objet adorable ?
Si tes ſouhaits ne ſont qu’à la conſiderer,
Crois, cher Endymion, que tu dois eſperer
