Le texte de cette page a été corrigé et est conforme au fac-similé.
Et si je n’ay la grâce
Pour meriter d’avoir
Ce bien, & qu’on pourchasse
De le me decevoir,
Ma fermeté fera,
Qu’il se contentera.
Ma voulenté plus grande, que l’effect,
Si elle estoit justement mesuree,
Rendre ne peult mon desir si parfaict,
Qu’elle ne soit en luy demesuree.
Et toutes fois s’estant avanturee
De tout en tout son pouvoir mesurer,
Oncques n’à peu seulement endurer
Son moindre effort : que feroit du surplus ?
Pour autant donc ne s’ose avanturer
De plus vouloir ce, qu’elle veult le plus.
Je ne croy point ce, que vous deites,
Que tant de bien me defiriez,
Comme a celle, pour qui vous feites
Ce, que pour vous faire deburiez.
Mais quelle plus estimeriez,
Ou celle, qui d’un cueur tremblant
N’ose dire ce, que vouldriez :
