Ie croy (diſt Epiſtemon) qu’en toute la patrie vous ne euſſiez mieulx choiſy. Ie ne diz ſeulement touchant les perfections d’vn chaſcun en ſon eſtat, les quelles ſont hors tout dez de iugement : mais d’abondant en ce que Rondibills marié eſt, ne l’auoit eſté : Hippothadée oncques ne le feut, & ne l’eſt : Bridoye l’a eſté, & ne l’eſt : Trouillogan l’eſt, & l’a eſté. Ie releueray Carpalim d’vne peine. Ie iray inuiter Bridoye, (ſi bon vous ſemble) lequel eſt de mon antique congnoiſſance : & au quel i’ay à parler pour le bien & aduencement d’vn ſien honeſte & docte filz, lequel eſtudie à Tholoſe ſoubs l’auditoire du treſdocte & vertueux Boiſſoné. Faictez (diſt Pantagruel) comme bon vous ſemblera. Et aduiſez ſi ie peuz rien pour l’aduencement du filz, & dignité du ſeigneur Boiſſoné, lequel ie ayme & reuere comme l’vn des plus ſuffiſans qui ſoit huy en ſon eſtat. Ie me y emploiray de bien bon cœur.
