eſt machinée par conuenance de Mercure auec Saturne, &c. Mais ce ſont ſecrets du conſeil eſtroit du Roy eternel, qui tout ce qui eſt, & qui ſe fait, modere à ſon franc arbitre & bon plaiſir. Lesquels vaut mieux taire & les adorer en ſilence, comme eſt dit Tob. xij. C’eſt bien fait de receler le Secret du Roy. Et Dauid le Prophete, pſal. lxiiij. ſelon la lettre Chaldaïque, Seigneur Dieu, ſilence t’appartient en Sion, & la raiſon il dit pſal. xvij. Car il a mis ſa retraite en tenebres. Dont en tous cas il nous conuient humilier, & le prier, ainſy que nous a enſeigné Ieſus Chriſt noſtre Seigneur, Que ſoit fait non ce que nous ſouhaitons & demandons, mais ce que luy plaiſt, & qu’il a eſtably deuant que les cieux fuſſent formez. Seulement que en tout & par tout ſon glorieux nom ſoit ſanctifié. Remettans le pardeſſus à ce qu’en eſt eſcrit es Ephemerides eternelles, lesquelles n’eſt licite à homme mortel traiter ou cognoiſtre, comme eſt proteſté, Act. I. Ce n’eſt pas à vous de cognoiſtre les temps & momens, que le Pere a mis en ſa puiſſance. Et à cette temerité eſt la peine interminée par le Sage Salomon, Prouerb. 25. Qui eſt perſcrutateur de ſa Maieſté, ſera opprimé de la meſme, &c…
Page:Rabelais marty-laveaux 03.djvu/264
Le texte de cette page a été corrigé et est conforme au fac-similé.
256
almanach povr l’an 1533
